O‘zbekistonda aeroportlar yaqinida varrak uchirish taqiqlanib, nazorat kuchaytirildi
Qoidabuzarlarga 20–100 BHM jarima yoki 15 sutkagacha qamoq jazosi qo‘llanadi.
O‘zbekistonda varrak uchirish mavsumi boshlanishi sabab aerodromlar yaqinida havo maydonidan foydalanish ustidan nazorat kuchaytirildi. Mutaxassislar bunday faoliyat samolyotlar parvoz xavfsizligiga jiddiy tahdid tug‘dirishini ta’kidlamoqda.
Uzbekistan Airports ma’lumotiga ko‘ra, aerodrom hududlarida parvozlar xavfsizligiga ta’sir ko‘rsatishi mumkin bo‘lgan har qanday faoliyat qat’iyan taqiqlangan. Varraklar balandlikka ko‘tarilib, samolyotlar bilan to‘qnashuv xavfini yuzaga keltirishi, ularning ipi dvigatellarga o‘ralib qolishi yoki texnik nosozliklarga sabab bo‘lishi mumkin.
Havo kodeksining 17-moddasiga muvofiq, parvoz xavfsizligiga tahdid soluvchi faoliyatga, shuningdek, havo kemalari va bortdagi odamlar xavfsizligiga ta’sir ko‘rsatishi mumkin bo‘lgan har qanday faoliyat kiradi. Aeroport hududida havo o‘yinchoqlarini uchirish bunday xavflarga taalluqlidir.
Shuningdek, Ma’muriy javobgarlik to‘g‘risidagi kodeksning 116²-moddasiga binoan, bunday qoidabuzarliklar uchun 20 dan 100 bazaviy hisoblash miqdorigacha jarima yoki 15 sutkagacha ma’muriy qamoq jazosi qo‘llanilishi mumkin. Agar ushbu harakatlar og‘ir oqibatlarga olib kelsa, jumladan aviahalokat yuz bersa, jinoiy javobgarlikka sabab bo'lishi ham mumkin.
Mutasaddi tashkilotlar fuqarolar va mamlakat mehmonlarini dam olish uchun parvoz yo‘nalishlaridan uzoq hududlarni tanlashga chaqirmoqda. Ta’kidlanishicha, ushbu qoidalarga rioya qilish nafaqat majburiyat, balki yo‘lovchilar va ekipaj xavfsizligini ta’minlashga qo‘shilgan muhim hissadir.
