Toshkentdan Guanchjouga uchayotgan samolyotni chaqmoq urdi
Hodisadan so‘ng samolyot texnik ko‘rik va ta’mirlash ishlari uchun foydalanishdan chiqarilgan.
Centrum Air aviakompaniyasi Toshkent–Guanchjou–Toshkent yo‘nalishidagi reyslardan birining kechikishiga samolyotga chaqmoq urilgani sabab bo‘lganini ma’lum qildi.
Aviakompaniya matbuot xizmatiga ko‘ra, 16-may kuni amalga oshirilgan C6511D/C6512D “Toshkent – Guanchjou – Toshkent” reysi avvalgi parvoz davomida samolyotga chaqmoq urilgani sababli sezilarli darajada kechiktirilgan.
Qayd etilishicha, hodisadan so‘ng havo kemasi darhol foydalanishdan chiqarilib, kompleks texnik ko‘rik, diagnostika hamda zarur ta’mirlash ishlari uchun yuborilgan.
Tekshiruv yakunlariga ko‘ra, aviakompaniya mazkur yo‘nalishdagi reysni boshqa samolyot orqali amalga oshirishga qaror qilgan.
Shuningdek, kompaniya majburiy kutish davrida barcha yo‘lovchilar mehmonxonaga joylashtirilgani va kuniga uch mahal ovqat bilan ta’minlanganini bildirgan.
Yangilangan parvoz jadvaliga ko‘ra, C6512D Guanchjou–Toshkent reysi 18-may kuni mahalliy vaqt bilan soat 20:25 da jo‘nab, Toshkentga 00:50 da yetib kelishi rejalashtirilgan.
