B1 sertifikatiga ega abituriyentlarga chet tili fanidan maksimal ballning 75 foizi beriladi

Adliya vazirligi tomonidan Xorijiy tillar va umumta’lim fanlarini bilish darajasini belgilovchi sertifikatlar ro‘yxatiga o‘zgartirish va qo‘shimchalar kiritildi. Bu haqda “Huquqiy axborot” Telegram-kanali xabar berdi.

 

Yangi tartibga ko‘ra, bakalavriatning fanlar majmuasida chet tili fani mavjud bo‘lgan ta’lim yo‘nalishlariga kirishda B1 darajadagi milliy yoki xalqaro tan olingan sertifikatga ega abituriyentlarga ushbu fan bo‘yicha belgilangan maksimal ballning 75 foizi miqdorida ball beriladi.

 

Shuningdek, ingliz tilidan beriladigan TOEFL iBT sertifikatining muvofiqlik darajasi endilikda 1–6 ballik tizim asosida belgilanadi.

 

Hujjatga muvofiq, pedagog xodimlarga ustama to‘lashda ingliz tilidan beriladigan TKT, TESOL, TEFL va TESL sertifikatlarining amal qilish muddati hisobga olinadi.

 

Bundan tashqari, kasbiy ta’lim tashkilotlari pedagoglariga xorijiy tilda maxsus fanlarni o‘qitgani uchun B2 darajadagi milliy yoki xalqaro tan olingan sertifikatga ega bo‘lsa, lavozim maoshining 50 foizi, C1 darajasidagi sertifikat uchun esa 100 foizi miqdorida har oylik ustama to‘lanadi.

 

Yangi tartibga ko‘ra, o‘qituvchilarga Digital SAT sertifikatining matematika bo‘limidan 750 va undan yuqori ball olgan taqdirda ham ustama belgilanadi.

 

Shuningdek, umumiy o‘rta ta’lim maktablarida faoliyat yuritayotgan musiqa madaniyati va jismoniy tarbiya fani o‘qituvchilariga B+ va undan yuqori darajadagi sertifikatlar uchun ustama berilishi nazarda tutilgan.