O‘zbekistonda 15 yillik stajga ega tibbiyot xodimlariga uy-joy uchun subsidiya beriladi
Yangi tartibga ko‘ra, subsidiya dasturi doirasida uy-joyni mamlakatning istalgan hududidagi birlamchi bozordan ipoteka krediti asosida xarid qilish mumkin bo‘ladi.
Hukumatning 2026-yil 12-iyundagi 310-son qarori bilan davlat tibbiyot muassasalarida kamida 15 yillik ish stajiga ega tibbiyot va farmatsevtika xodimlarini uy-joy bilan ta’minlash maqsadida ipoteka krediti asosida xarid qilinadigan uy-joyning boshlang‘ich badalining bir qismini qoplash tartibi tasdiqlandi. Bu haqda “Huquqiy axborot” Telegram-kanali xabar berdi.
Yangi tartibga ko‘ra, fuqarolar ro‘yxatdan o‘tgan hududidan qat’i nazar, mamlakatning istalgan hududidagi birlamchi uy-joy bozoridan subsidiya dasturi doirasida ipoteka krediti asosida uy-joy xarid qilishi mumkin.
Subsidiya olish uchun arizalar Davlat xizmatlari markazlari yoki my.gov.uz portali orqali qabul qilinadi.
Ariza beruvchilarni baholashda ularning amalda davlat tibbiyot muassasasida faoliyat yuritayotgani hamda davlat muassasalarda kamida 15 yillik ish stajiga ega ekani tasdiqlanishi lozim.
Qarorga muvofiq, subsidiya bir oilaga (er yoki xotindan biriga) faqat bir marta ajratiladi. G‘oliblar har chorak uchun belgilangan kvota doirasida mezonlarga to‘liq javob bergan nomzodlar orasidan onlayn tarzda tasodifiy tanlash usuli orqali aniqlanadi. Har chorakda 125 nafar nomzod subsidiya olish huquqini qo‘lga kiritadi.
Subsidiya ajratilgani to‘g‘risidagi xabarnomani olgan g‘olib uy-joyni ipoteka krediti asosida xarid qilish uchun qurilish (pudrat) tashkiloti bilan dastlabki shartnoma tuzadi.
