O‘zbekistonda taqiq yoki xatlovdagi uyda ro‘yxatdan o‘tishga ruxsat beriladi
Ko‘chmas mulkka oid huquqlarni rasmiylashtirish tartibi soddalashtiriladi. Ayrim holatlarda uy-joyni sotishdan olingan daromadni soliqqa tortish tartibi ham o‘zgaradi.
Prezidentning 2026-yil 15-iyuldagi “Aholiga ko‘rsatilayotgan davlat xizmatlarini takomillashtirish hamda fuqarolar uchun qo‘shimcha qulayliklar yaratish chora-tadbirlari to‘g‘risida”gi PQ–265-son qarori qabul qilindi. Bu haqda “Huquqiy axborot” Telegram-kanali xabar berdi.
Qarorga ko‘ra, ko‘chmas mulkka bo‘lgan huquqlarni davlat ro‘yxatidan o‘tkazishda huquq egasi belgilangan muddatda ro‘yxatdan o‘tkazuvchi organga murojaat qilmagan bo‘lsa, endilikda unga ma’muriy javobgarlik qo‘llanilmaydi. Buning o‘rniga kechiktirilgan muddatdan kelib chiqib, ro‘yxatdan o‘tkazish uchun oshirilgan stavkada to‘lov undiriladi.
Shuningdek, soliq to‘lovchiga tegishli turar joy meros tariqasida yoki yaqin qarindoshidan hadya sifatida o‘tgan bo‘lsa, uni sotishdan olingan daromadni soliqqa tortmaslik uchun belgilangan muddat endi vasiyat qiluvchi yoki hadya qiluvchining ushbu uy-joyga bo‘lgan mulk huquqi davlat ro‘yxatidan o‘tkazilgan sanadan boshlab hisoblanadi.
Qaror bilan taqiq yoki xatlov qo‘yilgan turar joyda garovga oluvchining roziligisiz yashash va doimiy yoki vaqtincha ro‘yxatdan o‘tishga ham ruxsat berildi.
Bunda ro‘yxatdan o‘tkazilayotgan shaxs mulkdor, garovga oluvchi yoki taqiqni qo‘yish va bekor qilishga mas’ul organning ichki ishlar organlariga murojaati asosida uning ro‘yxatdan o‘tkazilgani bekor qilinishiga oldindan rozilik bildirishi shart.
