O‘zbekistonda havo harorati 48 darajagacha ko‘tarilishi kutilmoqda
18–20-iyul kunlari mamlakatga janubdan juda issiq havo oqimlari kirib kelishi davom etadi.
“O‘zgidromet” O‘zbekiston hududida anomal issiq ob-havo saqlanib qolishi va ayrim hududlarda havo harorati 48 darajagacha ko‘tarilishi mumkinligi haqida ogohlantirdi.
Ma’lum qilinishicha, 18–20-iyul kunlari mamlakat hududiga janubdan juda issiq havo oqimlari kirib kelishi davom etadi. Respublikaning aksariyat hududlarida havo harorati 43–45 daraja, janubiy va cho‘l hududlarida esa ayrim joylarda 46–48 darajagacha ko‘tarilishi prognoz qilinmoqda.
Shuningdek, respublika bo‘yicha shamol tezligi 13–18 m/s, ayrim hududlarda esa 20–22 m/s gacha kuchayishi, ba’zi joylarda chang-to‘zon kuzatilishi mumkin.
Avval xabar qilinganidek, mamlakat hududiga 13-iyuldan boshlab janubdan kirib kelgan issiq havo oqimlari fonida elektr energiyasi iste’moli tarixiy rekord darajaga yetdi. Jazirama sabab ayrim hududlarda maktabgacha ta’lim tashkilotlari faoliyati vaqtincha to‘xtatildi, Surxondaryo va Qashqadaryo viloyatlarida og‘ir yuk avtomobillari harakatiga vaqtinchalik cheklovlar joriy etildi.
Shuningdek, Mehnat inspeksiyasi ish beruvchilarga jazirama sharoitida ochiq havoda olib boriladigan ishlarni kunning eng issiq vaqtida qisqartirish yoki to‘xtatish, xodimlarni ichimlik suvi, soyali dam olish joylari hamda issiqdan himoyalovchi maxsus kiyimlar bilan ta’minlash zarurligini eslatgan.
