Ўзбекистонда электр истеъмоли янги рекорд ўрнатди: ёзги кўрсаткич қишки максимумдан ҳам ошди

 

Ўзбекистонда электр энергияси истеъмоли бўйича янги рекорд қайд этилди. Ёзги суткалик истеъмол ҳажми илк бор қиш мавсумидаги тарихий максимумдан ҳам ошди.

 

Энергетика вазирлиги маълумотига кўра, 2026 йил 14 июль куни мамлакат ягона энергетика тизимида суткалик электр энергияси истеъмоли 284 миллион кВт·соатни ташкил этган. Мазкур кўрсаткич 13 июль куни қайд этилган ёзги рекорддан 5,4 миллион кВт·соатга (1,94 фоиз), шунингдек, 24 январда қайд этилган қишки максимумдан 1 миллион кВт·соатга юқори бўлган.

 

Шу куни электр энергияси ишлаб чиқариш ҳажми ҳам рекорд даражага етиб, 287,3 миллион кВт·соатни ташкил этган. Бу қиш мавсумидаги энг юқори ишлаб чиқариш ҳажмидан 9,7 миллион кВт·соатга (3,49 фоиз) кўпдир.

 

Вазирлик маълум қилишича, юқори юклама даврида электр таъминоти барқарорлигини сақлаш мақсадида авария-таъмирлаш бригадалари кучайтирилган тартибда ишламоқда. Хусусан, Тошкент шаҳрининг айрим туманлари ҳамда Қашқадарё вилоятида шамол оқибатида юзага келган носозликлар тезкор бартараф этилган.

 

Айни пайтда ҳудудларда электр станциялари, подстанциялар, трансформатор пунктлари ва электр узатиш тармоқларини модернизация қилиш ҳамда қувватини ошириш бўйича режали ишлар давом эттирилмоқда.

 

Энергетика вазирлиги айрим ҳудудларда юқори юклама сабаб электр таъминотида вақтинчалик узилишлар кузатилиши мумкинлигини билдириб, фуқароларни электр энергиясидан оқилона фойдаланишга чақирди. Хусусан, кондиционерларни 24–26°С ҳароратда ишлатиш ва уларнинг фильтрларини мунтазам тозалаб туриш тавсия этилган.