Жазирама сабаб Сурхондарёда юк машиналари ҳаракати чекланади
Чекловлар жазирама иссиқ туфайли асфальт қопламаси шикастланишининг олдини олиш мақсадида жорий этилмоқда.
Сурхондарё вилоятида ўта иссиқ об-ҳаво сабаб оғир юк автомобиллари ҳаракатига вақтинчалик чеклов жорий этилади.
Вилоят ҳокимлиги маълум қилишича, жазирама ҳаво шароитида автомобиль йўллари қопламасини сақлаш ҳамда уларнинг муддатидан олдин шикастланишининг олдини олиш мақсадида оғир юк транспорти ҳаракати вақтинча чекланади.
Гидрометеорология хизмати маълумотларига кўра, вилоятда кундузи ҳаво ҳарорати 42–44°С, айрим ҳудудларда эса ундан ҳам юқори даражага кўтарилмоқда. Бундай шароитда асфальт қопламаси ҳарорати 70–80°С гача етиши натижасида йўлларнинг юк кўтариш қобилияти пасайиб, оғир транспорт воситалари таъсирида деформациялар юзага келиши мумкин.
Шу муносабат билан Термиз шаҳри, туман марказлари ҳамда уларни боғловчи умумий фойдаланишдаги автомобиль йўлларида оғир юк автомобилларининг ҳаракати ҳар куни соат 10:00 дан 19:00 гача вақтинча чекланади.
Вилоят ҳокимлиги ҳайдовчилар ҳамда юк ташувчи корхона ва ташкилотлардан белгиланган чекловларга қатъий амал қилиш, юк ташиш вақтларини олдиндан режалаштиришни сўради.
Қайд этилишича, мазкур чоралар йўл инфратузилмасини асраш, ҳаракат хавфсизлигини таъминлаш ҳамда автомобиль йўлларининг хизмат муддатини узайтиришга хизмат қилади.
