O‘zbekistonda ayrim talabalar universitet diplomini 3 yilda olishi mumkin

O‘zbekistonda mahalliy va xorijiy universitetlar bilan integratsiyalashgan yangi ta’lim dasturlari joriy etiladi. Bu haqda Prezident Shavkat Mirziyoyevga tanishtirilgan taqdimotda ma’lum qilindi.

 

Taqdimotda maktab, akademik litsey, texnikum va oliy ta’lim o‘rtasidagi uzviylikni ta’minlaydigan "2+3", "1+2", "2+1", "1+3", "2+2" va "3+1" kabi integratsiyalashgan ta’lim modellari ko‘rib chiqildi.

 

Unga ko‘ra, 9-sinf bitiruvchilari maktab, akademik litsey yoki texnikumda ikki yil tahsil olib, keyingi uch yilni mahalliy yoki xorijiy hamkor oliygohda davom ettirishi mumkin bo‘ladi. Texnikum bitiruvchilariga esa ta’limni qisqartirilgan dastur asosida universitetda davom ettirish imkoniyati yaratiladi.

 

Shuningdek, integratsiyalashgan ta’lim dasturlarini tibbiyot, energetika, san’at va qishloq xo‘jaligi kabi ustuvor yo‘nalishlarda ham joriy etish rejalashtirilmoqda.

 

Xalqaro malakalar va baholash markaziga integratsiyalashgan dasturlarni nufuzli TOP-100 oliygohlar akademik talablariga moslashtirish, ular bilan “1+3” va “2+2” shaklidagi dasturlarni ishlab chiqish vazifasi yuklatildi.

 

Markaz huzurida xorijiy ekspertlardan iborat doimiy ishchi guruh tashkil etiladi. U 2027-yil yakuniga qadar yetakchi xorijiy universitetlar diplomini beradigan kamida ikkita ta’lim dasturi markazini ishga tushirishi belgilangan.

 

Bundan tashqari, "El-yurt umidi" jamg‘armasi stipendiya dasturi ham yangi tizimga moslashtiriladi. Endilikda u Integratsiyalashgan dasturlar oliy maktabi hamda boshqa mahalliy oliygohlardagi integratsiyalashgan ta’lim yo‘nalishlarini ham qamrab oladi.

 

Dunyoning nufuzli universitetlariga shartli qabul qilingan yoshlarning O‘zbekistondagi oliygohlarda birinchi kurs yoki Foundation dasturida o‘qish xarajatlarini qoplash mexanizmi joriy etiladi. Bu ularga ta’limni O‘zbekistonda boshlab, keyinchalik xorijdagi oliygohda davom ettirish imkonini beradi.