Surxondaryodagi dalada 4 kilo “gashish” topildi
Shuningdek, Jizzaxda fuqaroning yonidagi xo‘jalik qopidan qariyb 5 kg kannabis o‘simligi aniqlandi.
Surxondaryo va Jizzax viloyatlarida Davlat xavfsizlik xizmati hamda Ichki ishlar organlari xodimlari hamkorligida o‘tkazilgan tezkor tadbirlar davomida jami qariyb 9 kilogramm giyohvandlik vositalari noqonuniy muomaladan olindi. Bu haqda DXX xabar berdi.
Ma’lum qilinishicha, Surxondaryo viloyatining Termiz tumanida o‘tkazilgan tezkor tadbirda qishloq xo‘jaligiga mo‘ljallangan dala maydonida noma’lum shaxslar tomonidan qoldirib ketilgan 4 kilogramm “gashish” moddasi aniqlanib, protsessual tartibda rasmiylashtirilgan.
Shuningdek, DXXning Jizzax viloyati bo‘yicha boshqarmasi va Ichki ishlar organlari hamkorligida o‘tkazilgan tadbirda Zarbdor tumanida yashovchi 1981-yilda tug‘ilgan fuqaro Jizzax shahrida tekshirilganida, uning yonidagi xo‘jalik qopi ichidan 4 kilogramm 840 gramm kannabis o‘simligi topilib, ashyoviy dalil sifatida musodara qilingan.
Mazkur holatlar yuzasidan jinoyat ishlari qo‘zg‘atilib, tergov doirasida ushbu qonunbuzarliklarga aloqador shaxslarni aniqlash va javobgarlikka tortish bo‘yicha zarur choralar ko‘rilmoqda.
