Tojikiston-Afg‘oniston chegarasida mahalliy aholi halok bo‘ldi
Dushanbe hodisa yuzasidan Afg‘onistonga norozilik notasi yubordi.
Tojikiston Afg‘onistonning Badaxshon viloyatida yuz bergan qurolli to‘qnashuvlar oqibatida mamlakatning chegara hududida fuqaro halok bo‘lgani yuzasidan Afg‘oniston tomoniga norozilik notasi yubordi. Bu haqda Tojikiston Tashqi ishlar vazirligiga tayanib TASS xabar berdi.
Qayd etilishicha, Afg‘onistonning Tojikistonning Tog‘li Badaxshon avtonom viloyati Darvoz tumani bilan chegaradosh hududlarida so‘nggi kunlarda qurolli to‘qnashuvlar kuchaygan. Mazkur janglar Tojikistonning chegara hududlarida xavfsizlikka tahdid tug‘dirgani aytilmoqda.
Tojikiston TIV ma’lumotiga ko‘ra, qurolli to‘qnashuvlar natijasida Tojikiston havo hududi buzilgan, turar joy binolariga zarar yetgan hamda tinch fuqaro halok bo‘lgan.
Xususan, 13-avgust kuni Tog‘li Badaxshon avtonom viloyatining Darvoz tumanidagi Dashtoq qishlog‘ida yashovchi fuqaro Panj daryosining Afg‘oniston qirg‘og‘idan otilgan o‘q uzilishi oqibatida halok bo‘lgan.
Shu munosabat bilan Dushanbe Afg‘oniston tomoniga qat’iy norozilik bildirgan.
Tojikiston tomoni Kobuldan davlat chegarasining daxlsizligini hurmat qilish, bunday hodisalarning takrorlanishiga yo‘l qo‘ymaslik va tegishli samarali choralarni ko‘rishni talab qilgan.
Tojikiston TIV Badaxshondagi qurolli to‘qnashuvlar ayrim hududlarda xavfsizlikka tahdid solayotgani va xalqaro huquq me’yorlariga zid oqibatlarga olib kelayotganini ta’kidlagan.
