31-avgust uchun o‘qituvchilarning ish haqidan pul ushlab qolinmaydi
Maktabgacha va maktab ta’limi vazirligi ijtimoiy tarmoqlarda tarqalgan xabarlarga rasmiy munosabat bildirdi.
O‘zbekistonda 31-avgust — dam olish kuni munosabati bilan maktablarda xodimlar, jumladan, o‘qituvchilarning ish haqidan pul ushlab qolinmaydi. Maktabgacha va maktab ta’limi vazirligi axborot xizmati rahbari ijtimoiy tarmoqlarda tarqalgan ish haqi to‘lovlariga oid xabarlar yuzasidan rasmiy munosabat bildirdi.
Vazirlikka ko‘ra, amaldagi mehnat qonunchiligida dam olish kuni munosabati bilan, jumladan, 31-avgust uchun maktab xodimlarining ish haqidan ushlab qolish nazarda tutilmagan. Shu sababli ish haqini ushlanmalarsiz, to‘liq miqdorda to‘lash bo‘yicha topshiriq berilgan.
Shuningdek, maktab va maktabgacha ta’lim tashkilotlari xodimlarining avgust oyining ikkinchi yarmi uchun ish haqi to‘lovlari 29-avgustdan boshlab amalga oshirilmoqda.
Qayd etilishicha, maktablarda xodimlarga ish haqi to‘lovlari shtatlar jadvali hamda tarifikatsiya ro‘yxati bo‘yicha ajratilgan dars soatlari asosida amalga oshiriladi.
Bunda o‘qituvchilarga tarifikatsiya ro‘yxatida ularga belgilangan oylik yuklama, ya’ni stavkasidan kelib chiqqan holda ish haqi to‘lanadi.
