Sud ishlariga aralashuv: mansabdorlar 5 yilgacha qamalishi mumkin
O‘zbekistonda sud ishlariga noqonuniy aralashganlik uchun javobgarlik kuchaytirildi.
O‘zbekistonda sud ishlarini hal etishga noqonuniy aralashganlik va sud binosida tartibni buzganlik uchun javobgarlik kuchaytirildi. Tegishli qonun bilan Jinoyat kodeksi hamda Ma’muriy javobgarlik to‘g‘risidagi kodeksga o‘zgartirish va qo‘shimchalar kiritildi.
Jinoyat kodeksining 236-moddasi yangi tahrirda bayon etildi:
Tergov qilishga aralashish, ya’ni ishni har tomonlama, to‘la va xolisona o‘rganilishiga to‘sqinlik qilish maqsadida surishtiruvchi, tergovchi yoki prokurorga turli shaklda qonunga xilof ravishda ta’sir o‘tkazish 3 yilgacha axloq tuzatish ishlari yoki 1 yildan 3 yilgacha ozodlikni cheklash yoki uch yilgacha ozodlikdan mahrum qilish bilan jazolanadi.
Sud ishlarini hal etishga aralashish, ya’ni muayyan ishning har tomonlama, to‘la va xolisona ko‘rib chiqilishiga to‘sqinlik qilish yoxud adolatsiz hukm, hal qiluv qarori, ajrim yoki qaror chiqarilishiga erishish maqsadida sudyaga yoki xalq maslahatchisiga turli shakllarda qonunga xilof ravishda ta’sir o‘tkazish 3 yilgacha axloq tuzatish ishlari yoki 1 yildan 3 yilgacha ozodlikni cheklash yoxud 3 yilgacha ozodlikdan mahrum qilish bilan jazolanadi.
Ushbu moddaning birinchi yoki ikkinchi qismida nazarda tutilgan harakatlar mansabdor shaxs tomonidan sodir etilgan bo‘lsa, muayyan huquqdan mahrum etib, 3 yildan 5 yilgacha ozodlikni cheklash yoki 3 yildan 5 yilgacha ozodlikdan mahrum qilish bilan jazolanadi.
Bundan tashqari, Ma’muriy javobgarlik to‘g‘risidagi kodeksning 180-moddasiga (sudga hurmatsizlik) qo‘shimcha kiritildi.
Unga ko‘ra, guvoh, jabrlanuvchi, da’vogar, javobgar, ishda qatnashuvchi boshqa shaxslarning sudga kelishdan qasddan bo‘yin tovlashida yoki mazkur shaxslarning va boshqa fuqarolarning raislik qiluvchi farmoyishiga bo‘ysunmasligida yoxud sud majlisi paytida yoki sud binosida tartibni buzishda o‘z ifodasini topgan sudga hurmatsizlik bazaviy hisoblash miqdorining 1 baravaridan 3 baravarigacha miqdorda jarima solishga sabab bo‘ladi.
Qonun Qonunchilik palatasi tomonidan 24-fevralda qabul qilinib, Senat tomonidan 19-mayda ma’qullangan. Hujjat sudning mustaqilligi va sudyalar daxlsizligini ta’minlash hamda ularning faoliyatiga har qanday aralashuvlarning oldini olishga qaratilgan.
