O‘zbekiston Prezidenti Koreyadagi vatandoshlar bilan muloqot qildi
Shavkat Mirziyoyev yurtdoshlar bilan suhbatlashib, ularning faoliyati, o‘qishi va kelajak rejalari bilan qiziqdi.
Davlat tashrifi bilan Seul shahriga kelgan Prezident Shavkat Mirziyoyevni Koreya Respublikasida mehnat qilayotgan va tahsil olayotgan vatandoshlar samimiy kutib oldi.
Davlat rahbari yurtdoshlar bilan suhbatlashib, ularning faoliyati, o‘qishi va kelajak rejalari bilan qiziqdi. Muloqot chog‘ida O‘zbekistonda kechayotgan yangilanishlar, vatandoshlarning orzu-intilishlari hamda tashrif doirasida bo‘lajak tadbirlarning ahamiyati haqida fikr almashildi.
Prezident ularga ish va o‘qishida muvaffaqiyatlar tilab, Koreyada egallanayotgan zamonaviy bilim, ko‘nikma va tajriba kelgusida O‘zbekiston ravnaqi va xalq farovonligiga xizmat qilishiga ishonch bildirdi.
