Indoneziyada yo‘lovchi kemasi ag‘darildi: 100 dan ortiq odam bedarak yo‘qoldi
Hodisa oqibatida 6 kishi halok bo‘lgan, 107 kishi qutqarilgan.
Indoneziyada 243 kishi bo‘lgan yo‘lovchi kemasi Yava dengizida ag‘darilib ketdi. Hodisa oqibatida 6 kishi halok bo‘lgan, 107 kishi qutqarilgan, yana 130 kishi bedarak yo‘qolgan.
Basarnas qidiruv-qutqaruv agentligi ma’lumotiga ko‘ra, “Virgo Transport 8” kemasida 213 nafar yo‘lovchi va 30 nafar ekipaj a’zosi bo‘lgan. Kema shanba kuni Surabayadan Banjarmasinga yo‘l olgan va yakshanba tongida operatori bilan aloqani uzgan.
Qutqaruv ishlari davom etmoqda. Hududda qutqaruv kemalari va vertolyotlar jalb qilingan. Biroq balandligi 2,5 metrga yetayotgan to‘lqinlar operatsiyani qiyinlashtirmoqda.
Rasmiylar hodisaga noqulay ob-havo sabab bo‘lgan bo‘lishi mumkinligini bildirgan. Ayni paytda kemaning cho‘kish sabablari, jumladan, texnik nosozlik ehtimoli ham tekshirilmoqda.
