O‘zbekiston TIV Saudiya Arabistoniga hujumdan xavotir bildirdi
Vazirlik tinch aholi, fuqarolik va energetika infratuzilmasi obyektlariga qarshi kuch ishlatilishini hamda Yaqin Sharq davlatlari xavfsizligiga tahdid soluvchi har qanday harakatlarni keskin qoraladi.
O‘zbekiston Respublikasi Tashqi ishlar vazirligi Yaqin Sharqdagi vaziyatning yanada yomonlashuvi, xususan, Saudiya Arabistoni hududiga raketa va uchuvchisiz uchish apparatlari orqali amalga oshirilgan hujumlardan chuqur xavotir bildirdi.
Vazirlik tinch aholi, fuqarolik va energetika infratuzilmasi obyektlariga qarshi kuch ishlatilishini, shuningdek, mintaqa davlatlari xavfsizligi va xalqaro kema qatnoviga tahdid soluvchi har qanday harakatlarni keskin qoraladi.
TIV xalqaro huquq normalariga, jumladan, davlatlarning suvereniteti, mustaqilligi va hududiy yaxlitligini hurmat qilish tamoyillariga qat’iy rioya etilishi zarurligini ta’kidladi.
Vazirlikka ko‘ra, yuzaga kelgan kelishmovchiliklar faqat siyosiy-diplomatik vositalar, muloqot va o‘zaro hurmat asosida bartaraf etilishi lozim.
O‘zbekiston BMT va mintaqa davlatlarining Yaqin Sharqda keskinlikni yumshatish, mojaroning yanada kengayishiga yo‘l qo‘ymaslik hamda barqaror tinchlikni ta’minlashga qaratilgan sa’y-harakatlarini qo‘llab-quvvatlashini bildirdi.
