Qamchiq dovonidagi kutilmagan sarguzasht: yo‘lini yo‘qotgan 17 kishiga yordam berildi
Fuqarolar yashash manzillariga sog‘-salomat yetkazilgan.
Toshkent viloyatining Ohangaron tumanida tog‘li hududga dam olish uchun chiqib, adashib qolgan 17 nafar fuqaroga amaliy yordam berildi.
12-sentyabr kuni soat 21:27 da “112” tizimi orqali “Qamchiq” Maxsus qutqaruv boshqarmasiga fuqarolar tog‘li hududda adashib qolgani haqida xabar kelib tushgan.
Ma’lum bo‘lishicha, ular “Toshkent–O‘sh” avtomobil yo‘lining “Vodiy–Toshkent” yo‘nalishidagi 107-kilometr, “Chinor” QFY hududida bo‘lgan.
Xabardan so‘ng voqea joyiga qidiruv-qutqaruv bo‘linmalari jalb etilgan. Qutqaruvchilar qidiruv ishlari davomida tog‘ qiyaliklaridan 17 nafar fuqaroni topib, xavfsiz hududga olib tushgan.
Fuqarolar yashash manzillariga sog‘-salomat yetkazilgan. Hodisa oqibatida hech kim tan jarohati olmagan.
