Noqonuniy diniy taʼlim va giyohvandlik: sobiq imom-xatib 3,5 yilga qamaldi
Sobiq imom-xatib 5 nafar voyaga yetmaganga noqonuniy diniy taʼlim bergani va giyohvandlik vositalarini isteʼmol qilgani uchun 3 yil 6 oyga ozodlikdan mahrum etildi.
Samarqand viloyatining Urgut tumanida sobiq imom-xatib voyaga yetmaganlarga noqonuniy diniy taʼlim bergani hamda giyohvandlik vositalarini isteʼmol qilgani uchun sudlandi. Bu haqda “Zamon” informatsion dasturida maʼlum qilindi.
Jinoyat ishlari bo‘yicha Urgut tuman sudida ko‘rib chiqilgan ish materiallariga ko‘ra, 42 yoshli sudlanuvchi avval Urgut tumanida imom-xatib bo‘lib ishlagan. U 2026-yil may oyining oxirlaridan 23-iyunga qadar xonadonida 5 nafar voyaga yetmagan bolaga diniy saboq bergan.
Tergov hujjatlarida diniy mashg‘ulotlar uchun har bir boladan oyiga 100 AQSH dollaridan haq olish ko‘zda tutilgani qayd etilgan.
23-iyun kuni Davlat xavfsizlik xizmatining Urgut tuman bo‘limi hamda tuman IIB xodimlari tomonidan o‘tkazilgan tezkor tadbir davomida u xonadonida diniy adabiyotlar va boshqa ashyoviy dalillar bilan ushlangan.
Xonadonini ko‘zdan kechirish vaqtida alohida qadoqlangan, umumiy og‘irligi 3,75 gramm bo‘lgan opiy hamda 5,66 gramm marixuana aniqlangan. Shuningdek, sudlanuvchining voyaga yetmaganlarga diniy saboq berish jarayonida giyohvandlik vositalarini isteʼmol qilgani ham tergovda qayd etilgan.
Sudda sudlanuvchi aybiga iqror bo‘lib, karantin davridan buyon giyohvandlik vositalarini isteʼmol qilib kelganini tan olgan va qilmishidan pushaymonligini bildirgan.
Sud hukmiga ko‘ra, unga Jinoyat kodeksining 229²-moddasi ikkinchi qismi hamda 276-moddasi ikkinchi qismi “a” bandida nazarda tutilgan jinoyatlar bo‘yicha jazo tayinlangan.
Jazolarni qisman qo‘shish yo‘li bilan sudlanuvchiga uzil-kesil 3 yil 6 oy muddatga ozodlikdan mahrum qilish jazosi tayinlangan. Shuningdek, u 2 yil muddatga O‘zbekiston musulmonlari idorasi tizimida rahbarlik va masʼul lavozimlarni egallash hamda diniy taʼlim berish faoliyati bilan shug‘ullanish huquqidan mahrum qilingan.
Sud hukmiga asosan, sudlanuvchiga jazoni o‘tash bilan birga giyohvandlikdan majburiy davolanish chorasi ham qo‘llanilgan.
