Prezident topshirig‘i bilan podpolkovnik Dilnoza Redjabovaga polkovnik unvoni berildi

Ichki ishlar vazirligi tizimida qariyb 20 yildan buyon xizmat qilib kelayotgan podpolkovnik Dilnoza Redjabovaga “polkovnik” maxsus unvoni berildi. Bu haqda IIV xabar berdi.

 

Dilnoza Redjabova Ichki ishlar vazirligi Jamoat xavfsizligi departamenti Yo‘l harakati xavfsizligi xizmati Axborot xizmatida yetakchi mutaxassis lavozimida faoliyat yuritadi. U xizmat faoliyati davomida yo‘l harakati xavfsizligini targ‘ib qilish, aholiga yo‘l harakati qoidalarini tushunarli yetkazish hamda bolalar o‘rtasida xavfsizlik madaniyatini shakllantirishga e’tibor qaratib kelgan.

 

Uning tashabbusi bilan o‘quvchi yoshlardan iborat yo‘l harakati xavfsizligi targ‘ibotchilari guruhi shakllantirilgan. Mazkur guruh 2024-yilda Qirg‘izistonda, 2025-yilda Tojikistonda o‘tkazilgan xalqaro tanlovlarda II o‘rinni egallagan. 2026-yil avgust oyida Qozog‘istonda tashkil etilgan “Yosh yo‘l harakati inspektorlari” xalqaro musobaqasida esa I o‘rinni qo‘lga kiritgan.

 

Shuningdek, Toshkent shahri Olmazor tumanidagi 441-sonli maktabgacha ta’lim tashkilotida bolalarga yo‘l harakati qoidalarini amaliy va ko‘rgazmali tarzda o‘rgatishga qaratilgan mashg‘ulotlar yo‘lga qo‘yilgan.

 

Dilnoza Redjabovaning ko‘p yillik samarali xizmati va erishgan natijalari inobatga olinib, O‘zbekiston Respublikasi Prezidentining topshirig‘iga binoan, Ichki ishlar vazirining buyrug‘i bilan u rag‘batlantirildi va “polkovnik” maxsus unvoni berildi.

 

Mazkur unvon Ichki ishlar vaziri boshchiligida o‘tkazilgan tadbirda unga tantanali ravishda topshirildi.