Yaman chegarasidan uzoqroq turing: Saudiya Arabistonidagi o‘zbekistonliklar ogohlantirildi
Shuningdek, mintaqadagi keskinlik sababli parvozlar kechikishi yoki yo‘nalishi o‘zgarishi mumkin.
O‘zbekistonning Saudiya Arabistonidagi elchixonasi vatandoshlarni Yaman bilan chegara hududlariga yaqinlashmaslikka, xavfsizlik qoidalariga rioya qilishga hamda aviareyslar jadvalidagi ehtimoliy o‘zgarishlarni hisobga olishga chaqirdi. Bu haqda “Dunyo” axborot agentligi xabar berdi.
Diplomatik vakolatxona mintaqada saqlanib qolayotgan keskinlik sababli parvozlar jadvali, yo‘nalishlari va tranzit qoidalarida o‘zgarishlar yuz berishi mumkinligini bildirgan. Bu holatlar reyslarning kechikishi, yo‘lovchilarning boshqa reyslarga o‘tkazilishi yoki parvoz yo‘nalishining o‘zgarishiga olib kelishi mumkin.
Elchixona ma’lumotiga ko‘ra, Saudiya Arabistonida ichki vaziyat barqarorligicha qolmoqda, jamoat xavfsizligiga tahdidlar yoki maxsus cheklov choralari qayd etilmagan.
Shu bilan birga, vatandoshlarga Saudiya Arabistoni va Yaman o‘rtasidagi chegara hududlariga bormaslik, mahalliy hokimiyat organlarining xavfsizlik bo‘yicha ko‘rsatmalariga qat’iy amal qilish tavsiya etildi. Shuningdek, harbiy obyektlar va turli hodisalar oqibatlarini tasvirga olmaslik, tekshirilmagan ma’lumotlarni tarqatmaslik, rasmiy axborot manbalaridan foydalanish hamda shaxsni tasdiqlovchi hujjatlarni doimo yonida olib yurish so‘raldi.
Zarur hollarda O‘zbekiston fuqarolari mamlakatning Saudiya Arabistonidagi diplomatik vakolatxonalariga murojaat qilishlari mumkin.
Elchixona barcha vatandoshlarni ehtiyotkor bo‘lishga, tinchlik va xavfsizlik qoidalariga qat’iy rioya qilishga chaqirdi.
