50 sotix yer uchun 100 ming dollar: Paxtaobod hokimi o‘rinbosari ushlandi
U va kadastr idorasi mansabdori fuqarodan auksion orqali arzon narxda yer olib berish evaziga pul talab qilgan.
Andijon viloyatining Paxtaobod tumanida hokim o‘rinbosari va Davlat kadastrlari palatasi tuman filiali mansabdori noqonuniy harakatlari uchun ushlandi. Bu haqda DXX xabar berdi.
Aniqlanishicha, ular o‘zaro til biriktirib, xizmat mavqeyidan foydalangan holda tadbirkorlik faoliyati bilan shug‘ullanmoqchi bo‘lgan fuqaroning ishonchiga kirgan.
Mansabdorlar tuman hokimligi zaxirasidagi 50 sotix yer maydonini onlayn auksion orqali arzon narxda fuqaro nomiga rasmiylashtirib berish evaziga undan 100 ming AQSH dollari talab qilgan.
Davlat xavfsizlik xizmati va Bosh prokuratura huzuridagi Departament xodimlari hamkorligida o‘tkazilgan tezkor tadbirda ular talab qilingan pul mablag‘ining 30 ming dollarini uchinchi shaxs orqali olayotgan vaqtida qo‘lga olingan.
Holat yuzasidan mansabdor shaxslarga nisbatan Jinoyat kodeksining 168-moddasi 4-qismi “a” va “g” bandlari hamda 28,211-moddasi 3-qismi “a” bandi bilan jinoyat ishi qo‘zg‘atilgan. Hozirda tergov harakatlari olib borilmoqda.
