Birida 2,5 ming, boshqasida 4,4 ming dollar: noqonuniy “Umra” tashkilotchilari aniqlandi
Farg‘ona va Andijonda fuqarolarni noqonuniy ziyoratga yuborish evaziga pul talab qilgan ikki shaxs ushlandi.
Farg‘ona va Andijon viloyatlarida “Umra” ziyoratiga borishni istagan fuqarolarning ishonchidan foydalanib, noqonuniy ravishda pul talab qilgan shaxslar aniqlandi.
Ma’lum qilinishicha, Farg‘ona shahrida faoliyat yurituvchi sayyohlik firmasining norasmiy ishchisi tegishli ruxsatnomaga ega bo‘lmagan holda ikki nafar fuqaroni Saudiya Arabistoniga “Umra” ziyoratiga yuborish evaziga 2 500 AQSH dollari talab qilgan.
Davlat xavfsizlik xizmati va Ichki ishlar vazirligining hududiy boshqarmalari xodimlari hamkorligida o‘tkazilgan tezkor tadbirda u 2 450 AQSH dollarini olayotgan vaqtida ashyoviy dalillar bilan ushlangan. Holat yuzasidan unga nisbatan jinoyat ishi qo‘zg‘atilib, tergov harakatlari olib borilmoqda.
Shunga o‘xshash holat Andijon viloyatining Shahrixon tumanida ham qayd etilgan. Bu yerda noqonuniy faoliyat yuritayotgan turistik firma xodimi to‘rt nafar fuqaroni “Umra” ziyoratiga yuborish evaziga 4 400 AQSH dollari talab qilgan.
DXX Andijon viloyati boshqarmasi hamda viloyat Ichki ishlar boshqarmasi xodimlari hamkorligida o‘tkazilgan tezkor tadbirda u otasi bilan birgalikda 4 300 AQSH dollarini olayotgan vaqtida ushlangan.
Hozirda holat yuzasidan tergovga qadar tekshiruv harakatlari olib borilmoqda.
