Markaziy bank tekshiruvlari natijasi: 6 ta bank va 2 ta mikromoliya tashkiloti jarimaga tortildi
Bank nazorati qo‘mitasi tomonidan oktabr oyida 43 ta masalani ko‘rib chiqildi.
O‘zbekiston Markaziy banki Bank nazorati qo‘mitasi 2026-yil oktabr oyida o‘tkazilgan yig‘ilishlar yakunida oltita bank va ikkita mikromoliya tashkilotiga nisbatan jarima sanksiyalarini qo‘lladi. Bu haqda regulyator matbuot xizmati xabar berdi.
Ma’lum qilinishicha, qo‘mita oktabr oyida jami olti marta yig‘ilish o‘tkazib, 43 ta masalani ko‘rib chiqqan va ular yuzasidan tegishli qarorlar qabul qilgan.
Ko‘rib chiqilgan masalalarning 23 tasi ro‘yxatga olish va ruxsat berish yo‘nalishiga taalluqli bo‘lgan. Jumladan, kredit tashkilotlari ustavlariga kiritilgan o‘zgartirishlarni ro‘yxatdan o‘tkazish, banklarda audit o‘tkazish huquqini beruvchi auditorlik malaka sertifikatlarini taqdim etish, mikromoliya tashkilotlarini hisob ro‘yxatidan o‘tkazish va akkreditatsiya qilish, to‘lov tashkilotlariga litsenziya berish masalalari muhokama qilingan.
Shuningdek, kredit tashkilotlarining ustav fondidagi ulushga egalik qilish uchun ruxsat berish, tijorat banklari kuzatuv kengashi va boshqaruvi a’zolari hamda muhim ahamiyatga ega xodimlar nomzodlarini ko‘rib chiqish bilan bog‘liq masalalar ham kun tartibidan o‘rin olgan.
Yig‘ilishlarda kredit va to‘lov tashkilotlarining moliyaviy holatiga oid 20 ta masala ham ko‘rib chiqilgan. Xususan, Markaziy bank ko‘rsatmalari va prudensial me’yorlar talablariga rioya etilishi, bank hamda nobank kredit tashkilotlarida o‘tkazilgan inspeksiya tekshiruvlari natijalari, shuningdek, moliyaviy xizmatlarni “tartibga solish qumdoni” doirasida sinovdan o‘tkazish masalalari muhokama qilingan.
Prudensial normativlar va qonunchilik talablariga rioya qilmagani, shuningdek, inspeksiya tekshiruvlari davomida aniqlangan qoidabuzarliklar uchun oltita bank va ikkita mikromoliya tashkilotiga jarima sanksiyalari qo‘llanilgan.
Bundan tashqari, yana bitta bank va bitta mikromoliya tashkiloti kelgusida ularga nisbatan chora va sanksiyalar qo‘llanishi mumkinligi haqida ogohlantirilgan.
