Toshkentda isitish tizimi qachon yoqiladi? — hokimlik izoh berdi
Hokimlik isitish tizimlarini ishga tushirishda amaldagi ob-havo sharoiti ham hisobga olinishini ma’lum qildi.
Toshkent shahar hokimligi isitish mavsumi qachon boshlanishiga izoh berdi. Belgilangan tartibga ko‘ra, isitish tizimlarini ishga tushirish uchun o‘rtacha sutkalik havo harorati ketma-ket besh kun davomida +8 darajadan past bo‘lishi kerak.
Hokimlik aholi havo sovishi bilan xonadonlarda harorat pasayishi va isitish mavsumi boshlanishini kutayotganini tushunishini bildirgan.
Shuningdek, isitish tizimlarini ishga tushirishda nafaqat belgilangan harorat mezoni, balki amaldagi ob-havo sharoiti ham hisobga olinishi ta’kidlandi. Havo keskin sovib ketgan taqdirda, tegishli qaror qabul qilish kechiktirilmaydi.
Ayni paytda Toshkent shahar hokimligi issiqlik tizimlarining mavsumga tayyorligini nazorat qilmoqda. Tayyorlov ishlari shahar xizmatlari va “Veolia Energy Tashkent” mutaxassislari bilan hamkorlikda olib borilmoqda.
Isitish tizimlarini ishga tushirish sanasi haqida qo‘shimcha ma’lumot berilishi bildirilgan.
