Toshkent yo‘llarida keng ko‘lamli ta’mirlash ishlari olib borilmoqda
Rekonstruksiya ishlari “Dolzarb 90 kun” dasturi doirasida amalga oshirilmoqda.
«Dolzarb 90 kun» dasturi doirasida poytaxt ko‘chalarini modernizatsiya qilish ishlari yakuniy bosqichga kirmoqda.
Dushanba kunidan boshlab kutilayotgan quruq va iliq ob-havo sharoiti boshlangan ishlarni yakunlash hamda yangi, yuqori sifatli asfalt qoplamasini yotqizish uchun qulay imkoniyat yaratadi.
So‘nggi kunlarda shaharning ayrim ko‘chalarida frezalash ishlari olib borilayotgani kuzatilmoqda.
Mazkur jarayon yo‘l ta’mirining muhim tayyorgarlik bosqichi bo‘lib, unda maxsus texnika yordamida eskirgan va yaroqsiz holga kelgan asfalt qatlami qirib olinadi.
Bu esa yangi asfalt qoplamasining tekis va sifatli yotqizilishini ta’minlaydi, yo‘l qoplamasining tez buzilishiga olib keluvchi omillarning oldini oladi hamda harakat xavfsizligi va yo‘llarning uzoq muddat xizmat qilishiga zamin yaratadi.
Yo‘lning yuqori qatlami vaqtincha olib tashlangani haydovchilar uchun ma’lum noqulayliklar tug‘dirishi mumkin. Shunga qaramay, ushbu ishlar yo‘l sifatini yaxshilash va harakat xavfsizligini oshirishga qaratilgan.
Yo‘l harakatini tashkil etish markazi haydovchilardan ehtiyotkor bo‘lishni, vaqtinchalik yo‘l belgilariga amal qilishni so‘rab, poytaxt yo‘llarida harakatni qulay va xavfsiz tashkil etish bo‘yicha ishlar davom etayotganini ma’lum qildi.
