Tergovchi va advokat 40 ming dollar pora bilan ushlandi
Tergovchi jinoyat ishini gumonlanuvchi foydasiga tugatib berish evaziga advokat orqali pul talab qilgan.
Namangan viloyatida tergovchi va advokat pora olish hamda vositachilik qilish holati bo‘yicha qo‘lga olindi. Bu haqda DXX xabar berdi.
Ma’lum qilinishicha, Namangan viloyati IIB Tergov boshqarmasi tergovchisi o‘zining ish yurituvida bo‘lgan, Chust tumanida yashovchi, 2006 yilda tug‘ilgan fuqaroga nisbatan qo‘zg‘atilgan jinoyat ishini uning foydasiga ijobiy hal qilib, tugatib berish evaziga ishga aloqador bo‘lmagan advokat orqali 40 ming AQSH dollari talab qilgan.
Chust tumanida o‘tkazilgan tezkor tadbirda advokatlar hay’ati advokati gumonlanuvchining otasidan 40 ming AQSH dollarini olgan vaqtida ashyoviy dalillar bilan qo‘lga olingan.
So‘ngra tezkor tadbir davom ettirilib, tergovchi advokatdan 30 ming AQSH dollarini olgan vaqtida noqonuniy harakatga chek qo‘yilgan.
Hozirda tergovchiga nisbatan Jinoyat Kodeksining 210-moddasi (pora olish) bilan, advokatga esa JKning 212-moddasi (pora olish-berishda vositachilik qilish) bilan jinoyat ishi qo‘zg‘atilib, “qamoq” ehtiyot chorasi qo‘llanildi.
