АҚШда норозилик намойишлари ўтказилмоқда
Тартибсизликлар давом этса, денгиз пиёдалари жалб этилади.
АҚШда ноқонуний муҳожирларнинг депортациясига қарши норозилик намойишлари кучаймоқда. Мудофаа вазири Пит Хегсетнинг маълум қилишича, тартибсизликларни жиловлаш мақсадида Лос-Анжелесга Миллий гвардия сафарбар этилади. Зарурат туғилса, денгиз пиёдалари ҳам жалб қилиниши мумкин.
Вазир ижтимоий тармоқдаги “X” саҳифасида ёзишича, ИСE (Иммиграция ва божхона назорати) ходимлари билан намойишчилар ўртасида юзага келган тўқнашувлар миллий хавфсизликка таҳдид солмоқда.
“Лос-Анжелесдаги федерал ҳуқуқни муҳофаза қилиш органларини қўллаб-қувватлаш учун Мудофаа вазирлиги Миллий гвардияни жойлаштиришга киришди. Агар тартибсизликлар давом этса, денгиз пиёдалари ҳам юқори жанговар шайлик ҳолатида сафарбар қилинади”, — дея баёнот берди Хегсет.
Маълумот учун, жума куни шаҳар бўйлаб ноқонуний муҳожирларнинг оммавий ҳибсга олиниши бошланган. Шанба кунига қадар 44 киши иммиграция қонунларини бузганликда айбланиб ҳибсга олинган. Бу ҳаракатларга жавобан шаҳарда оммавий норозилик намойишлари авж олди.
