“Атиргул” кўрик-танлови ғолиблари тақдирланди
Маросимда уюшмага янги қабул қилинган 25 нафар аёл журналистга ҳам аъзолик гувоҳномалари топширилди.
Ўзбекистон Журналистлар уюшмаси ташаббуси ва Оила ва хотин-қизлар қўмитаси ҳамкорлигида хотин-қиз журналистлар ўртасида ўтказилган “Атиргул” кўрик-танловининг ғолибларини тақдирлаш маросими бўлиб ўтди.
Танлов журналистика соҳасида фаолият юритаётган аёлларнинг касбий маҳорати, ижодий изланишлари ва жамият ҳаётидаги фаоллигини қўллаб-қувватлаш мақсадида ташкил этилди.
Кўрик-танловнинг 12 та номинацияси бўйича ғолиблар тақдирланди. Иштирокчиларнинг ижодий ишлари мазмуни, долзарблиги, касбий маҳорати ва янгича ёндашуви асосида ҳакамлар ҳайъати томонидан баҳоланди.
Тадбир давомида Ўзбекистон Журналистлар уюшмасига янги қабул қилинган 25 нафар аёл журналистга аъзолик гувоҳномалари ҳам топширилди.
Ташкилотчиларга кўра, “Атиргул” танлови аёл журналистларнинг ижодий салоҳиятини намоён этиш, илғор тажрибаларини оммалаштириш ҳамда касбий ҳамкорлик ва тажриба алмашиш учун имконият яратишга хизмат қилади.
Бугунги кунда журналистика тезкорлик билан бир қаторда чуқур таҳлил, замонавий технологиялардан фойдаланиш ва янги ижодий ёндашувларни талаб қилмоқда. Шу нуқтайи назардан, танлов хотин-қиз журналистларнинг ушбу йўналишлардаги ишларини рағбатлантиришга қаратилган.
Тақдирлаш маросимида танлов ғолиблари ва янги уюшма аъзоларига муваффақият тилаклари билдирилди.
