Нетаняxу Ғазо ҳақидаги фильмни танқид қилди: уни антисемитик тарғибот деб атади
Исроил бош вазири Венеция кинофестивалида мукофотланган “NAZA” ҳужжатли фильмига кескин муносабат билдирди.
Исроил бош вазири Бенжамин Нетаняҳу Ғазодаги уруш ва тинч аҳоли қурбонлари ҳақида ҳикоя қилувчи “NAZA” ҳужжатли фильмини яҳудийларга қарши антисемитик тарғиботнинг бир қисми деб атади.
Исроиллик субъектларидан Ювал Абраҳам ва Рачел Сзор суратга олган фильм Венеция кинофестивалида Махсус ҳакамлар ҳайъати мукофотига сазовор бўлди. Унда Ғазодаги урушда қатнашган разведка ходимлари ва ҳарбийларнинг аноним интервьюлари келтирилган.
Нетаняҳу фильмда Исроил армияси уруш жиноятларида айбланаётганини танқид қилди. Исроил ҳарбийлари бош қўмондони Эял Замир ҳам фильмни Исроил давлатига қарши ҳужум деб баҳолаб, унда воқелик бузиб кўрсатилгани ва ҳарбийларга нисбатан ёлғон айбловлар илгари сурилганини айтди.
Исроил ҳарбийлари фильм ва унга алоқадор шахсларга нисбатан ҳуқуқий чоралар кўриш имкониятлари ўрганилаётганини маълум қилди.
Фильм режиссёри Ювал Абраҳам эса жиноятларни инкор этиш уларнинг давом этишига сабаб бўлишини айтиб, исроилликларни фильмни кўришга чақирди.
Ғазо соғлиқни сақлаш идоралари маълумотларига кўра, Исроилнинг ҳарбий амалиёти оқибатида 73 мингдан ортиқ фаластинлик ҳалок бўлган. Исроил эса ҳарбий амалиётлар давомида тинч аҳоли орасидаги қурбонлар сонини камайтириш учун барча чораларни кўраётганини билдиради.
