Европада газ нархи кескин ошди: 2022 йил охиридан бери энг юқори кўрсаткич
Европа газ бозори Яқин Шарқдаги вазият ва муҳим транспорт йўналишларида юзага келаётган хавфлар фонида босим остида қолди.
Европада табиий газ нархи Форс кўрфазидан етказиб беришдаги эҳтимолий узилишлар ҳақидаги хавотирлар фонида кескин ошди. Инвесторлар, хусусан, Ҳормуз бўғозининг блокланиши Яқин Шарқдан суюлтирилган табиий газ (СTГ) экспортига узоқ муддатли таъсир кўрсатишидан хавотирда.
DW ёзишича, 14 сентябрь куни Амстердамдаги ТТF биржасида бир ойлик етказиб бериш учун базавий газ фьючерслари нархи 5 фоиздан кўпроққа ошиб, мегаватт-соатига 83,75 еврога етди. Бу 2022 йил охиридан бери қайд этилган энг юқори кўрсаткич бўлди.
DPA агентлиги маълумотларига кўра, бозордаги ўсишга Яқин Шарқдан СTГ етказиб беришдаги эҳтимолий узилишлар ҳақидаги хавотирлар сабаб бўлмоқда.
Нефть нархи ҳам ошди
14 сентябрь куни нефть нархлари ҳам 2 фоиздан кўпроққа кўтарилди. Brent маркали нефть нархи бир баррель учун 107 доллардан ошган бўлса, WTI нархи 103 долларга яқинлашди.
2026 йил бошидан буён Европада газ нархи қарийб уч баравар ошди. Brent маркали нефть эса шу даврда қарийб 80 фоизга қимматлашди.
Шу билан бирга, Brent нархи апрель ойи охирида қайд этилган бир баррель учун 126 доллардан юқори оралиқ чўққидан анча паст даражада қолмоқда.
Яна бир муҳим транспорт йўналишига таҳдид кучайди
Қизил денгиздаги Боб ал-Мандаб бўғозида ҳам вазият кескинлашмоқда. Эрон томонидан қўллаб-қувватланадиган Ямандаги ҳусийлар 11 сентябрь куни бўғоз устидан назоратни қўлга олганини маълум қилди.
Саудия Арабистони эса ҳусийлар томонидан амалга оширилган дрон ҳужумларидан сўнг «Шарқ-Ғарб» нефть қувури фаолиятини вақтинча тўхтатди. Саудия Арабистони Яманда ҳукумат кучларини қўллаб-қувватламоқда.
Германия ва Европанинг бошқа давлатлари қиш мавсуми бошланишидан олдин газ омборларидаги захираларни қисқа муддатда тўлдиришга ҳаракат қилмоқда.
Bloomberg томонидан кемалар ҳаракатини кузатиш маълумотлари асосида ўтказилган таҳлилга кўра, сентабр ойи бошида Ғарбий Европага STG етказиб бериш ҳажми ошган. Бироқ ўтган ҳафта етказиб бериш яна камайган, газ омборларини тўлдириш суръати эса секинлашган.
