Кўмир конидаги фожиа: 4 кончи ҳалок бўлди
Покистондаги кўмир конида газ портлади.
Покистоннинг жануби-ғарбий қисмидаги Балужистон вилояти, Ҳарнаи туманида жойлашган кўмир конида газ тўпланиши оқибатида портлаш содир бўлди. Ҳодисада тўрт кончи ҳалок бўлган, яна беш киши жароҳатланган.
The Nation нашрининг хабар беришича, портлашдан сўнг бир нечта кончи ер остида қолиб кетган. Қутқарувчилар уларни кон ичидан олиб чиқишган.
Жароҳатланганлар тиббий ёрдам кўрсатиш учун вилоят маркази — Кветта шаҳридаги шифохоналарга етказилган.
Дастлабки маълумотларга кўра, портлашга кон ичида метан газининг тўпланиши сабаб бўлган.
