“Бу – қадрият” – Озодбек Назарбеков қистирилган пулларни олганига изоҳ берилди
Интернетда Озодбек Назарбеков тўйда қўшиқ куйлаб, унга қистирилган пулларни олаётгани акс этган видео тарқалди.
Ижтимоий тармоқларда Маданият вазири Озодбек Назарбеков тўй маросимида қўшиқ куйлаб, меҳмонлар томонидан қистирилган пулларни олаётгани акс этган видео тарқалди. Мазкур ҳолат жамоатчилик муҳокамасига сабаб бўлди. Вазиятга Маданият вазирлиги расмий муносабат билдирди.
Вазирлик матбуот хизмати раҳбари Сирожиддин Ўсаровнинг Kun.uz'га маълум қилишича, видео 2025 йил 25 октябрь куни вазирлик ходимларидан бирининг никоҳ тўйида олинган. Унга кўра, вазир ушбу ҳолатни олдиндан режалаштирмаган, аммо фуқаролар томонидан узатилган пулларни рад этиш уларни омма олдида ноқулай аҳволга солиб қўйиши, ҳаттоки камситиш ёки менсимаслик сифатида талқин қилиниши мумкин эди.
Маданият вазирлиги таъкидлашича, тўй маросимларида хонандаларга пул қистириш амалдаги қонунчиликда тақиқланмаган. Бу ҳолат халқимиз орасида асрлар давомида шаклланган миллий урф-одат ва қадриятларнинг бир қисми бўлиб, ўзбекона анъаналарда «орзу-ҳавас» сифатида эътироф этилади.
Шунингдек, вазирлик Озодбек Назарбеков нафақат вазир, балки таниқли хонанда, бир неча давлатларнинг халқ артисти ва хизмат кўрсатган маданият ходими эканини эслатди. Шу боис, тўйда кузатилган ҳолат унинг касбий фаолияти билан боғлиқ вазият сифатида баҳоланиши лозимлиги қайд этилди. Вазирлик хулосасига кўра, инсон эгаллаб турган лавозимидан қатъи назар, ўз касбидан ажралиб кета олмайди.
