Afg‘onistonning Hirоt viloyatida ayollar uchun yangi cheklovlar joriy etildi. “Tolibon” harakati viloyatdagi savdo do‘konlariga yuzini to‘liq yopmagan ayollarni kiritmaslik bo‘yicha ko‘rsatma berdi deydi ExpressAsia.
Mahalliy axborotlarga ko‘ra, mazkur talab savdo maskanlari egalari bilan o‘tkazilgan yig‘ilishda e’lon qilingan. Endilikda sotuvchilar hijob yoki paranjini to‘liq taqmagan ayollarga xizmat ko‘rsatishdan bosh tortishi shart bo‘ladi.
Qayd etilishicha, ushbu choralar ayollarning jamoat hayotidagi ishtirokini cheklashga qaratilgan siyosat doirasida amalga oshirilmoqda.
Hozirda qizlar uchun maktab va oliy ta’lim muassasalarida o‘qish taqiqi hamon saqlanib qolgan. Avvalroq shunga o‘xshash cheklovlar sudlar, shifoxonalar, davlat idoralari hamda O‘zbekiston bilan chegaradagi bozorlarga borishga nisbatan ham qo‘llanilgandi.