Afg‘onistonda “Islomiy davlat” a’zolari Tojikiston qurolli kuchlari joylashgan manzilga yettita raketa otishdi. Xabarlarga ko‘ra, o‘q uzuvchi qurilma avtomobilga o‘rnatilgan. O‘qqa tutilganidan so‘ng chegarachilar qarshi tomonga qarata o‘t ochgan, biroq ular qochishga muvaffaq bo‘lgan.
Tojikiston chegara xizmati Afg‘onistondan qilingan hujumni tasdiqladi.
Qayd etilishicha, hodisa Xatlon viloyatining Farxor tumanida yuz bergan. Afg‘oniston tomondan 7 ta raketa otilgan. 4 ta snaryad Amudaryoga, yana 3 tasi yaqin atrofdagi o‘rmonga tushgan.
“Harbiy xizmatchilar terrorchilar bo‘lgan mashinani ko‘rishgan. Mashina yonib ketgan, uch nafar hujumchi yaralangan, birining ahvoli og‘ir”, — deyiladi Sputnik Tojikiston xabarida.