Андижонда банкдан қарздор МЧЖ биноси хатланди
МИБ хабарига кўра, ташкилот 2,4 млрд миқдоридаги кредит қарзини тўламай келган.
Тадбиркорлик фаолиятини ривожлантириш мақсадида тижорат банкларидан олинган кредитлар ўз вақтида тўланмаган ҳолларда, қарздорликни қоплаш учун гаровга қўйилган мулкка нисбатан мажбурий чоралар қўлланилади.
Мажбурий ижро бюроси Андижон вилояти бошқармаси иш юритувида бўлган суд ҳужжатларига мувофиқ, қарздор масъулияти чекланган жамият ҳисобидан ундирувчи “Garant bank” АЖ фойдасига жами 2,4 миллиард сўм миқдоридаги кредит қарзи ундирилиши белгиланган.
Суд ҳужжатларига асосан ундирувни гаровдаги жавобгарга тегишли бўлган ишлаб чиқариш бинолари ва иссиқхона иншоотларига қаратиш белгиланган.
Бюронинг вилоят бошқармаси ходимлари томонидан ижро ҳаракатлари амалга оширилиб, қарздорларга белгиланган тартибда огоҳлантиришлар берилди. Ижро жараёни давомида бошланғич баҳоси 3,7 миллиард сўм бўлган ишлаб чиқариш бинолари ва иссиқхона иншооти хатланди.
Ҳозирда хатланган мол-мулкларни электрон онлайн-аукцион савдосига чиқариш чоралари кўрилмоқда.
