АҚШда “Марказий Осиё – АҚШ” саммити ўтказилиши мумкин
АҚШ конгрессменлари Трампни C5+1 дипломатик формати ташкил этилганининг 10 йиллиги муносабати билан Марказий Осиё етакчилари иштирокида саммит ўтказишга чақирди.
АҚШ Конгресси аъзолари Доналд Трампни Марказий Осиё давлатлари иштирокида юқори даражадаги саммит ўтказишга чақирди.
Конгресс аъзолари Сидни Камлагер-Дав ва Билл Ҳюйзинга АҚШ президенти Доналд Трамп номига йўллаган мурожаатларида “Марказий Осиё – АҚШ” (C5+1) дипломатик формати ташкил этилганининг 10 йиллиги муносабати билан Вашингтонда саммит ташкил этишни таклиф қилишди. Бу ҳақда Камлагер-Давнинг расмий сайтида маълум қилинган.
“Мазкур саммитда президент Трампнинг шахсан иштироки C5+1 формати ташкил этилганининг 10 йиллигини муҳим дипломатик воқеликка айлантиради ва АҚШ ҳамда Марказий Осиё ўртасидаги ҳамкорликнинг кейинги ўн йилликдаги йўналишларини белгилаб беради”, — дейилади мурожаатда.
Эслатиб ўтамиз, “Марказий Осиё – АҚШ” (C5+1) формати 2015 йил ноябр ойида Самарқандда ўтказилган ташқи ишлар вазирларининг биринчи учрашувидан сўнг йўлга қўйилган. Платформа АҚШ ҳамда Ўзбекистон, Қозоғистон, Қирғизистон, Туркманистон ва Тожикистон ўртасидаги мулоқот ва стратегик ҳамкорликни кучайтиришга хизмат қилади.
Сўнгги йилларда мазкур формат доирасида энергетика, хавфсизлик, иқлим ўзгариши ва иқтисодий барқарорлик масалалари муҳокама қилиниб келинмоқда. 2023 йил сентябр ойида эса Нью-Йоркда C5+1 форматдаги биринчи президентлар учрашуви ўтказилган эди.
