АҚШнинг БМТдаги элчиси Африка давлатларини огоҳлантирди
Бу Россияга қарши санкциялар билан боғлиқ.
АҚШнинг БМТдаги доимий вакили Линда Томас-Гринфилд Африка давлатларига турне уюштирди. Сафари давомида у қитъа мамалкатларини Россия билан алоқалар оқибатидан огоҳлантирди.
"Россия ўз қишлоқ хўжалик маҳсулотлари ва ўғитларига қарши санкциялар нарх-навонинг кўтарилишига олиб келганини айтмоқда. Шуни маълум қиламанки, биз бу турдаги товарларга чеклов қўймаганмиз. Москва ўз қишлоқ хўжалик маҳсулотларини экспорт қилиши, бошқа давлатлар эса уни сотиб олиши мумкин", — деган элчи Угандадаги чиқишида.
Шу билан бирга дипломат тақиқлар остидаги маҳсулотларни сотиб олиш оқибатларидан огоҳлантирган. Томас-Гринфилд буни амалга оширган давлатларга иккиламчи санкциялар қўлланилишини маълум қилган.
BBC маълумотларига кўра, Африка давлатлари Украина можаросида Москвани очиқ қораламаяпти. Бунга уларнинг мустамлака ўтмиши ва Ғарбга бўлган ишончнинг пастлиги сабаб бўлиши мумкин. Бундан ташқари, Африка мамлакатлари элитасининг аксарияти Россияда таълим олган.
Аввалроқ Москва ва Пекин Африкадаги позицияларини мустаҳкамлаётгани тўғрисида хабар берилганди.
