Jinoyat ishlari bo‘yicha Quva tuman sudi Furqat tumani IIBning sobiq boshlig‘i Akmal Xo‘jaev va uning birinchi o‘rinbosari Jasur Rasulovga nisbatan hukmni e’lon qildi. Sud ularni bir qator moddalar bo‘yicha aybli deb topib, har biriga 4 yildan ozodlikdan mahrum etish jazosini tayinladi. Shuningdek, ular 3 yil davomida ichki ishlar tizimi va davlat ishtirokidagi tashkilotlarda mas’ul lavozimlarda ishlash huquqidan mahrum qilindi.
Ayblovga ko‘ra, Xo‘jaev va Rasulov shaxs sha’niga tajovuz qilish, turar joy daxlsizligini buzish, vakolatdan oshish va qonunga xilof ravishda ushlab turish kabi jinoyatlarni sodir etganlikda ayblandi. Sud jazo manzil-koloniyada o‘tilishini belgiladi.
Jabrlanuvchilar — Furqat tumanidagi maktab direktori Gulira’no Qosimova va soliq idorasi rahbari Qurbonali Abdurahmonovga ma’naviy va boshqa turdagi zararlarni qoplash yuzasidan fuqarolik sudiga murojaat qilish huquqi tushuntirildi. Shuningdek, ishda ishtiroki bo‘lishi mumkin bo‘lgan boshqa shaxslarga nisbatan jinoyat ishi qo‘zg‘atish masalasini ko‘rib chiqish uchun materiallar prokuraturaga yuboriladi.
Mazkur ish jamoatchilik e’tiborida bo‘lib, Qosimova sud jarayonining xolis o‘tishini so‘rab mas’ullarga murojaat qilgan edi. Senatorlar va Ichki ishlar vazirligi vakillari ham voqea yuzasidan munosabat bildirib, qonun ustuvorligi va inson qadri doimo himoya qilinishi kerakligini ta’kidladilar.