1 йилгача қамоқ ва 82 миллионгача жарима: Ўзбекистонда ҳайвонларга нисбатан зўравонлик учун жазолар кучайтирилади

Ўзбекистон Экологик партияси ҳайвонларга нисбатан шафқатсизлик учун жавобгарликни кескин кучайтиришни назарда тутувчи қонун лойиҳасини тайёрламоқда.

 

Мазкур ташаббус ҳайвонларга нисбатан зўравонлик ҳолатлари сақланиб қолаётган бир пайтда илгари сурилди. Эслатиб ўтилишича, жорий йилнинг 25 мартидан бошлаб бундай ҳуқуқбузарликлар учун 15 дан 25 БҲМгача миқдорда жарима (тахминан 6,1 млн сўмдан 10,3 млн сўмгача) ёки 15 суткагача маъмурий қамоқ жазоси белгиланган.

 

Таклиф этилаётган янги қонун лойиҳасида эса жазо чораларини янада кучайтириш кўзда тутилган. Хусусан, ҳайвонларга нисбатан шафқатсизлик учун жарималарни 200 БҲМгача (80 млн сўмдан ортиқ) ошириш ҳамда бир йилгача озодликдан маҳрум қилиш жазосини жорий этиш таклиф қилинмоқда.

 

Шунингдек, ҳужжатда қоидбузарлардан жароҳатланган ҳайвонларни даволаш билан боғлиқ барча харажатларни тўлиқ қоплаш талабини белгилаш ҳам назарда тутилган. Бу харажатлар ҳайвоннинг бозор қийматидан юқори бўлган тақдирда ҳам қоплаб берилиши керак бўлади.

 

Қонун лойиҳаси доирасида яна бир қатор ташаббуслар ҳам илгари сурилган. Жумладан, ҳайвонларга нисбатан шафқатсизлик тушунчасининг аниқ ҳуқуқий таърифи, уларни сақлаш учун зарур шарт-шароитларни белгилаш, уй ҳайвонлари учун қулай муҳит яратиш, эгалари мажбуриятларини аниқ белгилаш ҳамда ҳайвонларни қараовсиз қолдиришнинг олдини олиш чораларини ишлаб чиқиш таклиф қилинмоқда.

 

Бундан ташқари, мактаблар ва оммавий ахборот воситалари орқали ҳайвонларга ғамхўрлик қилиш маданиятини шакллантиришга қаратилган маърифий ишлар ҳам кучайтирилиши режалаштирилган.

 

Партия вакилларининг таъкидлашича, ушбу ҳужжат ҳайвонларга нисбатан шафқатсизлик муаммосини тизимли равишда ҳал этиш ва жамиятда уларга нисбатан инсопарвар муносабатни ривожлантиришга хизмат қилади.

 

Қонун лойиҳаси жамоатчилик фикр-мулоҳазалари инобатга олинган ҳолда яна такомиллаштирилиши режалаштирилган.