Birlashgan Millatlar Tashkiloti Xavfsizlik Kengashi Suriyaning muvaqqat prezidenti Ahmad al-Shara va ichki ishlar vaziri Anas Xattobni jahon tashkilotining sanksiya ro‘yxatidan chiqarish to‘g‘risidagi rezolyutsiyani qabul qildi.
Rezolyutsiya AQSh tomonidan tayyorlangan bo‘lib, Xavfsizlik Kengashining 15 a’zosidan 14 tasi uni qo‘llab ovoz berdi. Shu jumladan, Rossiya ham rezolyutsiyani yoqladi. Xitoy ovoz berishda betaraf qolgan.
Sanksiyalarning bekor qilinishi Suriyada siyosiy barqarorlikni ta’minlash va xalqaro hamkorlikni rivojlantirishga qaratilgan xalqaro tashabbuslar doirasida amalga oshirilmoqda.