So‘nggi sakkiz yil davomida mamlakatimizda ta’lim sohasida xususiy sektor faol rivojlanib, natijada 31 mingdan ortiq xususiy maktabgacha ta’lim muassasasi hamda 645 ta xususiy umumta’lim maktabi tashkil etildi. Bu haqda Prezident matbuot kotibi Sherzod Asadov ma'lum qildi.
Endilikda maktabgacha ta’lim qamrovi 70–80 foizdan past bo‘lgan 80 ta tumanda tadbirkorlar uchun qo‘shimcha qulayliklar joriy etilmoqda.
Unga ko‘ra:
bo‘sh yer maydonlarida davlat-xususiy sheriklik asosida bog‘chalar qurishga ruxsat etiladi;
yer uchun ijara to‘lovi 30 yil davomida undirilmaydi;
davlat bog‘chalarida bir bola uchun ajratiladigan xarajatlarning yarmi tadbirkorlarga subsidiyalanadi.
Shuningdek, boshqa joylarda bog‘cha tashkil etishni istagan tadbirkorlar quyidagi imtiyozlarga ega bo‘ladilar:
7 yil muddatga 5 milliard so‘mgacha 18 foiz stavkada imtiyozli kredit ajratiladi;
faoliyat yo‘nalishini o‘zgartirmaslik sharti bilan yer tekinga beriladi;
ijtimoiy soliq stavkasi 1 foiz etib belgilanadi;
tarbiyachilarning maoshi uch yilgacha davlat tomonidan qoplab beriladi.
Mazkur choralar xususiy ta’lim muassasalari ulushini oshirish, ta’lim sifatini yaxshilash va tadbirkorlikni yanada qo‘llab-quvvatlashga xizmat qiladi.