Божхона институти ходими 6 минг доллар пора билан қўлга тушди
У сирдарёлик фуқарони Ўзбекистон давлат жисмоний тарбия ва спорт университетига ўқишга киритиб қўймоқчи бўлган.
Сирдарё ва Фарғона вилоятларида ОТМга ўқишга киритиш билан боғлиқ ноқонуний ҳолатлар аниқланди.
Ўзбекистон Республикаси Давлат божхона қўмитасининг Божхона институти ходими Э. З. Сирдарё вилоятининг Сардоба туманида яшовчи фуқаронинг ишончига кириб, жорий йил учун мазкур олий таълим муассасасига қабул тугаганлигини айтиб, унинг ўғлини Ўзбекистон давлат жисмоний тарбия ва спорт университетига ўқишга киритиб қўйиш эвазига 6 минг АҚШ доллари талаб қилади.
Аммо у сўралган пулни олган вақтида ДХХнинг Сирдарё вилояти бўйича бошқармаси ҳамда Иқтисодий жиноятларга қарши курашиш департаментининг ҳудудий бошқармаси ходимлари томонидан ашёвий далиллар билан ушланган.
Бу йўналишда ДХХнинг Фарғона вилояти бўйича бошқармаси ходимлари ҳам ИЖҚК департаменти ходимлари билан ҳамкорликда тезкор тадбир ўтказган.
Бағдод туманида яшовчи, 1999 йилда туғилган И. Л. мазкур туманда истиқомат қилувчи аёлнинг қизини Тошкент тиббиёт академиясига ўқишга киритиб қўйиш эвазига 10 минг АҚШ доллари олган вақтида ушланган.
Дастлабки суриштирув ҳаракатлари давомида у ушбу пул маблағини Тошкент шаҳрида яшовчи, 1997 йилда Қашқадарё вилоятининг Ғузор туманида туғилган Қ. С. га олиб бориб бериши кераклиги маълум бўлиб, тезкор тадбир Тошкент шаҳрида давом эттирилган ҳамда у ҳам пулни олган вақтида қўлга тушган.
Ҳозирда ҳар икки ҳолат юзасидан қонунбузарларга нисбатан жиноят ишлари қўзғатилиб, тергов ҳаракатлари олиб борилмоқда.
