Британияда қиролича билан видолашишга келганларнинг соғлиги ёмонлашмоқда
Улар 16 соат навбатда туришга мажбур бўлмоқда.
Лондон тез ёрдам хизматига қиролича Елизавета II билан хайрлашиш учун навбатда турган одамлардан тинимсиз чақирувлар келиб тушмоқда.
“The Guardian” нашрининг ёзишича, 700 дан ортиқ одам соатлаб навбат кутиш ва тиқилинч оқибатида ўзини ёмон ҳис қила бошлаган. Уларнинг асосий қисмига жойида ёрдам кўрсатилган, 81 нафар бемор касалхонага ётқизилган.
Эслатиб ўтамиз, британияликлар 14 сентябрдан буён Вестминстер залида марҳум қиролича билан видолашиш учун навбатда турибди. Елизавета II нинг дафн маросими 19 сентябрь куни бўлиб ўтади.
Шанба куни эрталаб Буюк Британия қироли Чарльз III ва валиаҳд шаҳзода Уильям навбатда турган одамлар билан суҳбатлашиш учун келиб, Лондон марказида ишлаётган шифокорларга ҳам миннатдорчилик билдирди.
