Bugundan boshlab tijorat banklari va bank xizmatlari iste’molchilari o‘rtasidagi munosabatlarni tartibga soluvchi yangi talablar amalda qo‘llanila boshlandi. Bank xizmatlari iste’molchilari bilan o‘zaro munosabatlarni amalga oshirishda tijorat banklari faoliyatiga qo‘yiladigan minimal talablarga kiritilgan o‘zgartirish va qo‘shimchalar endilikda majburiy hisoblanadi.
Yangi qoidalarga ko‘ra, kredit shartnomasi rasmiylashtirilishidan oldin iste’molchilar kredit bo‘yicha barcha tavakkalchilik va majburiyatlarni tushunganini tasdiqlovchi maxsus chek-listni to‘ldirishi shart. Ushbu chek-list tasdiqlanmaguncha kredit shartnomasini rasmiylashtirishga yo‘l qo‘yilmaydi.
Shuningdek, kredit to‘lovlarini amalga oshirishda qiyinchilikka duch kelayotgan mijozlarga shartnoma shartlarini o‘zgartirish, yengillik va muqobil mexanizmlardan foydalanish imkoniyati beriladi. Banklarga iste’molchi arizasida ko‘rsatilgan miqdordan ortiqcha kredit taklif qilish yoki uni olishga undash qat’iyan taqiqlanadi.
Bundan tashqari, kredit qarzdorliklarini davlat tomonidan ajratiladigan ijtimoiy nafaqa va yordam mablag‘lari, jumladan ijtimoiy karta hisobvaraqlariga kelib tushadigan pullar hisobidan undirishga ruxsat berilmaydi. Masofaviy bank xizmatlari orqali kredit ajratishda esa banklar mijoz roziligini bildiruvchi belgilarni oldindan belgilab qo‘ymasligi, barcha tanlovlar iste’molchi tomonidan mustaqil amalga oshirilishini ta’minlashi shart.