Xitoy Xalq Respublikasi raisi sammit doirasida unga "Oliy Darajali Do‘stlik" ordenining topshirilishi o‘zbek xalqining xitoyliklarga chuqur do‘stlik tuyg‘usidan dalolat ekanini taʼkidladi va buyuk shoir Alisher Navoiyning «Yor o‘ling bir-biring‘izgakim, erur yorlig‘ ish» g‘azalidan iqtibos keltirdi.
«Ikki ming yil avval Buyuk Ipak yo‘li xalqlarimizni bog‘lagan. Biz bir-birimizdan foydali narsalarni oldik, bir-birimizdan o‘rgandik. Bundan 30 yil muqaddam diplomatik munosabatlar o‘rnatilishi bilan aloqalarimiz yana-da mustahkamlandi. Endi esa O‘zbekiston Prezidenti bilan men xalqlarimizni umumiy taqdirga bog‘lash maqsadida yangi davrda Xitoy-O‘zbekiston har tomonlama strategik sheriklik munosabatlarini yana-da chuqurlashtirishga kelishib oldik», — deydi Si Szinpin.
Sammitda Hindiston Bosh vaziri Narendra Modi ham ishtirok etdi. Ushbu tadbirdan so‘ng o‘z yurtiga jo‘nab ketgan Bosh vazir o‘zining Tvitter'dagi sahifasida o‘zbekistonliklarga minnatdorchilik bildirib, o‘zbek tilida post yozdi.
“SHHT sammitida samarali ikki va ko‘p tomonlaman uchrashuvlar olib bordik. O‘zbekiston xalqi va hukumatiga mehmondo‘stlik uchun minnatdorchilik bildiraman”,- deya yozib qoldirgan Bosh vazir.
Shuningdek, u "SHHT mintaqamizda ishonchli va xilma-xil taʼminot zanjirlarini rivojlantirishga harakat qilishi kerak", - degan fikrlarni ham yozib qoldirgan.