Германияни чемпион қилган футболчилар ҳозир қаерда?
Уларнинг айримлари аллақачон спортдаги фаолиятини якунлаган.
Германия терма жамоаси ўз уйида ўтаётган Евро-2024да олтин медални қўлга киритмоқчи ва йирик турнирдаги сўнгги ғалабасининг 10 йиллигини нишонламоқчи. 2014 йилнинг июль ойида немислар финалда Аргентинани мағлуб этиб жаҳон чемпиони бўлишганди. Бугун немисларни чемпион қилган футболчиларни биргаликда эслаймиз.
Мануэл Нойер, 38 ёш
Ўша мундиалдан 10 йил ўтди ва Нойер ҳамон Германия терма жамоасининг биринчи рақамли дарвозабони бўлиб қолмоқда. Бу ақл бовар қилмайдиган нарса! 2014 йилги жаҳон чемпионатида Мануэл барча учрашувларда майдонга тушиб, тўртта гол ўтказиб юборган. Жорий Европа чемпионатида "Бавария" дарвозабони ҳозирча тўртта ўйин ўтказди ва иккита гол ўтказиб юборди. Нойер Германия терма жамоаси тарихидаги ўйинлар сони бўйича кучли 5 нафар футболчидан бири ҳисобланади.
Филипп Лам, 40 ёш
Лам 2014 йилги жаҳон чемпионатида Германия терма жамоаси сардори бўлган. У барча ўйинларда иштирок этган ва иккита голли узатмани амалга оширган. Жаҳон чемпионатида ғолиб чиққан сўнг Филипп терма жамоадаги фаолиятини якунлади. Бироқ, у "Бавария"да яна уч мавсум ўйнади. Футболдаги фаолиятини тугатгандан сўнг, Лам 2017 йилда Германиянинг Евро-2024 даъвоси учун элчи этиб тайинланди. Кейин у "Штутгарт" клуби бошқарув кенгашининг маслаҳатчисига айланди.
Жером Боатенг, 35 ёш
2014 йилги жаҳон чемпионати финалида Германия терма жамоасининг икки марказий ҳимоячисидан бири. Турнирда Боатенг еттита ўйин ўтказиб, гол ура олмаган. Унинг терма жамоадаги фаолияти 2018 йилнинг ноябригача давом этган. Аммо клуб миқёсида ҳали ҳам давом этмоқда. 2021 йил сентябрь ойида Жером "Бавария"ни тарк этди ва эркин агент сифатида "Лион"га ўтди. Яна икки мавсумдан сўнг у клубсиз қолди, аммо олти ойдан сўнг у "Салернитана"га бориб қўшилди. Яқинда Боатенг Австриянинг "ЛАСК" клубига трансфер қилинди.
Матс Хуммелс, 35 ёш
Хуммелс жаҳон чемпионатида олтита учрашувда майдонга тушиб, иккита гол уради. Матс ҳам ёши катта бўлишига қарамай, футболчилик фаолиятини давом эттирмоқда. У Евро-2024да ўйнашни хоҳлаган эди, лекин Юлиан Нагелсманн уни жамоага таклиф қилмагани билиб, ҳафсаласи пир бўлди. Хуммелс шу ёзда "Боруссия"ни тарк этди. Ҳимоячи учун Италия ва Испанияда вариантлари бор.
Бастиан Швайнштайгер, 39 ёш
Швайнштайгер Германия терма жамоасининг ярим ҳимоячиси. 2014 йилги Жаҳон чемпионатида Бастиан олтита ўйин ўтказди ва иккита сариқ карточка олди. Швайнштайгернинг терма жамоадаги фаолияти 2016 йилнинг августигача давом этган. Катта спортни тарк этган Бастиан турмуш ўртоғи, таниқли собиқ теннисчи Ана Иванович билан бирга ҳаёт кечиришмоқда.
Тони Кроос, 34 ёш
2014 йилги жаҳон чемпионатининг яна бир ғолиби, у ҳали ҳам терма жамоада ўйнамоқда. Яқинда Тони кутилмаганда футболдаги фаолиятини якунлашини эълон қилди, гарчи у ҳали ҳам дунёнинг энг кучли футболчиларидан бири ҳисобланади. Немис футболчиси "Реал"даги сўнгги мавсумини Чемпионлар лигасида ғалаба билан якунлади. 2014 йилги жаҳон чемпионатида Тони етти ўйинда 2+3 натижа қайд этган.
Месут Ўзил
Ўзил 2014 йилги жаҳон чемпионатида саккизинчи рақамда ўйнаган. Турнирдаги еттита учрашувда Месут битта гол уради ва битта голли узатмани амалга оширади. У 2018 йилгача Германия терма жамоасида ўйнаган ва ўша йилги муваффақиятсиз жаҳон чемпионатидан сўнг терма жамоани тарк этган. Ҳужумкор ярим ҳимоячининг клубдаги фаолияти 2023 йилнинг март ойида якунига етган.
Томас Мюллер
Мюллер 2014 йилги жаҳон чемпионатида терма жамоада иштирок этган ва ҳали ҳам фаолиятини давом эттирмоқда. Аммо ҳозирда унинг Германия терма жамоасидаги роли унчалик аҳамиятли эмас. 10 йил олдин ҳужумчи немислар орасида энг сермаҳсул футболчига айланганди. У етти учрашувда 5+3 очко жамғарган. Евро-2024да Томас Шотландияга қарши 1-турда атиги 20 дақиқа ўйнади, бироқ битта голли узатмани амалга ошира олди. Мюллернинг клуб даражасидаги бутун фаолияти "Бавария"да ўтган.
Мирослав Клозе, 46 ёш
Германия терма жамоасининг афсонавий марказий ҳужумчиси. У 71 та гол билан терма жамоа тарихидаги тўпурар ҳисобланади. Клозе учун ЖЧ-2014 терма жамоадаги фаолияти учун ажойиб турнир бўлди. Ўша турнирда Мирослав бешта ўйинда иккита гол урди. Кейин Клозе "Лацио"да яна бир неча мавсум ўйнади ва спортни тарк этди ва мураббий сифатида иш бошлади. У Германия терма жамоаси ва "Бавария"да мураббий ёрдамчиси бўлган,
Андре Шюрле, 33 ёш
Шюрле ЖЧ-2014да Германия терма жамоасининг асосий ўйинчиси бўлмаган, бироқ финалда у Крамер ўрнига 32-дақиқада захирадан майдонга тушади ва голли узатмани амалга оширади. Умуман олганда, бу Андре учун муваффақиятли турнир бўлди. Олтита ўйинда у 3+1 ҳисобини қайд этиб, жамоада тўп киритиш бўйича учинчи бўлди. Унинг Германия терма жамоасидаги фаолияти 2017 йилнинг март ойида якунига этган. 2014 йилги жаҳон чемпионатида форвард "Челси" шарафини ҳимоя қилган, кейин "Волфсбург", “Боруссия Дортмунд” ва "Фулхем" клубларида ўйнаган. Айни вақтда футболчи бизнес билан шуғулланмоқда.
Марио Гётсе, 32 ёш
Немис футболининг “олтин боласи” ва жаҳон чемпионати финалидаги ягона гол муаллифи. Аргентина билан ўйинда Марио иккинчи бўлим охирида захирадан майдонга тушади ва 113-дақиқада ўзининг зарбаси билан Германия терма жамоасига ғалаба келтиради. Бу ҳужумкор ярим ҳимоячининг энг яхши вақти бўлди, унинг фаолияти, афсуски, жароҳатлар туфайли бузилди. Умуман олганда, Гётсе 2014 йилги Жаҳон чемпионатида олтита ўйинда 2+0 ҳисобини қайд этган. Айни вақтда футболчи 2022 йилдан бери Франкфуртнинг "Айнтрахт" клубида ўйнамоқда.
