Forbes jurnalining xabar berishicha, SpaceX va Tesla kompaniyalari asoschisi Ilon Mask tarixda sof boyligi 600 milliard dollarga yetgan birinchi shaxs sifatida tarixga kirdi. Ushbu rekord, shuningdek, Maskni dunyodagi birinchi trillioner bo‘lish sari yana bir qadam yaqinlashtirdi.
SpaceX 2026 yilda rejalashtirilgan IPOdan oldin kompaniyaning qiymatini 800 milliard dollarga baholadi. Bloomberg agentligi maʼlumotlariga ko‘ra, ushbu baholash tarixdagi eng yirik aksiyalar takliflaridan biri bo‘lishi mumkin. SpaseX‘dagi 42 foizlik ulushi orqali Maskning sof boyligi taxminan 168 milliard dollarga oshdi va umumiy qiymati 677 milliard dollarni tashkil qildi.
Bundan tashqari, Maskning Tesla‘dagi 12 foizlik ulushi 197 milliard dollarga baholangan, xAI Holdings kompaniyasi esa 230 milliard dollarlik yangi investitsiyalarni jalb qilish bo‘yicha muzokaralar olib bormoqda. Shu bilan birga, Mask kompaniyalarni tashkil qilgan paytdagi qiymati bilan solishtirilganda, bu ikki barobar o‘sishni anglatadi.
2024 yilda Informa Connect Academy tahlil guruhi Maskning 2027 yilga kelib dunyoning birinchi trillioneriga aylanishi mumkinligini bashorat qilgan edi. Mutaxassislar bu prognozni Maskning sof boyligi yiliga o‘rtacha 110 foiz o‘sish surʼatiga asoslashgan. Mask 2021 yilda Forbes ro‘yxatida dunyoning eng boy shaxsi sifatida birinchi o‘rinni egallab, Amazon asoschisi Jeff Bezosni ortda qoldirgandi. O‘sha paytdagi sof boyligi 271,3 milliard dollarni tashkil qilgan.