Исроил Жениндаги ҳарбий амалиётини якунлади
Исроил қўшинлари Фаластинда икки кун давом этган кенг кўламли ҳарбий амалиётни якунлади.
Исроил қўшинлари икки кун давом этган кенг кўламли ҳарбий амалиётни якунлади. Бу ҳақда Исроил армияси вакилига таяниб, Deutsche Welle хабар берди. Исроил ҳарбийлари террорчи гуруҳларни, уларнинг Женин шаҳрида жойлашган қўмондонлик марказини ҳамда қурол-яроғ ва портловчи моддалар омборларини нишонга олганини даъво қилмоқда.
Reuters агентлигига кўра, Женин шаҳрида қочқинлар лагери мавжуд бўлиб, у ерда Фаластиннинг турли ҳарбийлаштирилган, жумладан, исломий ҳаракати Хамас ва «Исломий жиҳод» гуруҳининг юзлаб жангарилари истиқомат қилади.
Фаластин томонига кўра, Исроил ҳарбий амалиёти бошланганидан буён 12 фаластинлик ҳалок бўлган, улардан камида беш нафари жангарилардир, 100 дан ортиқ киши яраланган. Шунингдек, Исроил ўз аскарларидан бирининг ўлганини эълон қилди.
