Mudofaa vazirligi tarkibida davlat muassasasi shaklida Jaloliddin Manguberdi nomidagi harbiy-akademik litseyi tashkil etiladi. Tegishli qaror prezident tomonidan imzolandi, deya xabar bermoqda “Nigoh”.
Qabul va o‘quv jarayoni 2023/2024-o‘quv yilidan boshlanadi, o‘quv jarayoni davomiyligi ikki yil bo‘lib, yillik qabul kvota 150 nafarni tashkil etadi.
Litseyning asosiy vazifalari:
- o‘quvchilarda xalqning maʼnaviy-maʼrifiy qadriyatlariga, madaniyati va urf-odatlariga chuqur hurmatni, ularda halollik, vijdoniylik, vatanparvarlik, sadoqat, fidokorlik singari insoniy fazilatlarni, shuningdek, milliy g‘urur tuyg‘ularini shakllantirish;
- xalqning tarixi va boy madaniyati, buyuk ajdodlarning qoldirgan bebaho merosi, vatan ozodligi va farovonligi yo‘lida o‘zini qurbon qilgan zamondosh vatandoshlarining qahramonligi asosida O‘zbekiston xalqiga sodiq, qatʼiy hayotiy qarashlar va faol fuqarolik pozitsiyasiga ega bo‘lgan o‘quvchilarni tarbiyalash va boshqalar.
Qayd etilishicha, litsey o‘rta maxsus taʼlim muassasasi hisoblanib, Urganch shahrida joylashadi.