Kanadaning sharqiy hududlari, xususan Ontario va Kvebek provinsiyalarida kuchli muzli bo‘ron sodir bo‘lib, 300 mingdan ortiq aholi elektr ta’minotisiz qolgan. Hydro One kompaniyasining ma’lumotiga ko‘ra, muzlarning og‘irligi sabab daraxtlarning shoxlari sinib, elektr simlariga zarar yetkazgan, natijada minglab uy xo‘jaliklari chiroqsiz qolgan.
Kanadaning atrof-muhit bo‘yicha boshqarmasi Environment Canada tomonidan qattiq sovuq va muzli yomg‘ir bo‘yicha ogohlantirishlar berilgan. Muz va qor aralash yog‘ingarchilik ba’zi hududlarda davom etishi kutilmoqda. Markaziy Ontarioda suv toshqinlari xavfi ham mavjud.
Ontario provinsiyasining Orillia shahrida mahalliy infratuzilmaga yetkazilgan zarar tufayli favqulodda holat e’lon qilingan. Shaharning rasmiy veb-saytida e’lon qilingan bayonotga ko‘ra, kuchli sovuq, elektr uzilishlari, qulab tushgan daraxtlar va yo‘llardagi xavfli sharoitlar sabab aholiga ehtiyotkorlik choralarini ko‘rish tavsiya etilgan.
Elektr energiyasini tiklash bo‘yicha ishlar davom etmoqda. Alectra kompaniyasi ma'lumotlariga ko‘ra, ayniqsa Toronto shimolidagi Barrie shahrida elektr ta’minoti uzilishlarining oldini olish juda qiyin bo‘lmoqda, chunki muz elektr simlari va ustunlariga yopishib, tiklash ishlarini sekinlashtirmoqda. Shunga qaramay, barcha mavjud resurslar safarbar qilingan.
Ijtimoiy tarmoq foydalanuvchilari yo‘llarning yopilishi va qulab tushgan daraxtlar haqida xabarlar bermoqda. Sinoptiklarning prognozlariga ko‘ra, bo‘ronning ta’siri 1-aprelgacha davom etishi mumkin.